● वणीत चक्काजाम, वाहतूक खोळंबली
रोखठोक | महाराष्ट्र नवनिर्माण सेनेचे नेते तथा प्रवक्ते यांच्यावर 4 अज्ञातांनी भ्याड हल्ला केला. याचे पडसाद संपूर्ण राज्यात उमटले आहे. वणीत प्रदेश उपाध्यक्ष राजू उंबरकर यांच्या मार्गदर्शनाखाली तालुकाध्यक्ष फाल्गुन गोहोकार व महाराष्ट्र सैनिकांनी लालपुलिया परिसरात शुक्रवारी सायंकाळी चक्काजाम केले. यामुळे बराच काळ महामार्गावरील वाहतूक खोळंबली होती.
मुंबई येथील शिवाजी पार्क परिसरात सकाळी संदीप देशपांडे हे मॉर्निंग वॉक करत असताना चार अज्ञात तरुणांनी भ्याड हल्ला केला. यावेळी मारेकरी तोंडाला रुमाल बांधून होते. क्रिकेटच्या स्टंम्पने ही मारहाण करण्यात आली. या हल्ल्यात जखमी झालेल्या देशपांडेवर मुंबईतील हिंदुजा हॉस्पिटलमध्ये उपचार करण्यात आले.
या घटनेचे पडसाद संपूर्ण राज्यात उमटले आहे. मनसेच्या नेत्यांनी तीव्र प्रतिक्रिया देत आपल्या भावना व्यक्त केल्या आहेत तर हल्लेखोरांना तात्काळ अटक करण्याची मागणी करण्यात आली आहे. प्रदेश उपाध्यक्ष राजू उंबरकर यांनी सुद्धा तीव्र संताप व्यक्त केला आहे.
वणी परिसरातील लाल पुलिया महामार्गावर मनसे तालुका अध्यक्ष फाल्गुन गोहोकार व कार्यकर्त्यांनी रस्तारोको करून तीव्र निषेध नोंदविला. यावेळी काही काळ तणावाचे वातावरण निर्माण झाले होते. पोलिसांनी घटनास्थळी धाव घेत आंदोलनकर्त्यांना ताब्यात घेतले.
यावेळी चक्काजाम आंदोलनात मनसे शहराध्यक्ष शिवराज पेचे, आजिद शेख, शहर उपाध्यक्ष गितेश वैद्य, इरफान सिद्दीकी, बंडू बोंडे, वैभव पुरानकर, रणजीत पिंगे, लोकेश लडके, आकाश काकडे, अमोल जेऊरकर, अराफत खान, अक्षय मोहूर्ले यांच्यासह महाराष्ट्र सैनिक उपस्थित होते.
वणी : बातमीदार
