● गोडगाव शिवारात गायीवर हल्ला
तालुक्यात वाघाचा मुक्तसंचार दहशतीचे वातावरण निर्माण करत आहे. शेतकरी, शेतमजूर भयभीत झाले आहेत. सोमवार दि.25 ऑक्टोबरला गोडगाव शिवारात वाघाने गायीवर हल्ला चढवल्याची घटना घडल्याने चांगलीच खळबळ माजली आहे.
गोडगाव येथील संजय रामकृष्ण दोरखंडे यांची जनावरे चराई करिता घटनेच्या दिवशी जंगल शिवारात गेली होती. अचानक वाघाने गायीवर झडप घातली, यात ती मोठया प्रमाणात जखमी झाली आहे. शरीरावर ओरबडल्याने रक्तस्त्राव सुद्धा चांगलाच झाला आहे.
काही दिवसांपूर्वी तालुक्यातील नवरगाव येथील शेतकऱ्याची कालवड वाघाने ठार केली होती. तर मारेगाव (कोरंबी) शिवारात तरुणाला वाघाचे दर्शन झाले होते. वाघ साक्षात समोर दिसताच भयावह अवस्थेत तो झाडावर चढला होता. खाली वाघ आणि झाडावर तो अशी स्थिती निर्माण झाली होती. तसेच सुकनेगाव परिसरात बैलावर वाघाने हल्ला करून बैलाला जखमी केले होते.
गोडगाव शिवारात एक दिवसांपूर्वी मुरलीधर डबले यांच्या दोन गायीचा फडशा पडल्याची चर्चा ताजी असतानाच आज पुन्हा हमला झाल्याने पशुपालक संतप्त झाले असून वाघाचा बंदोबस्त करावा अशी मागणी करण्यात आली आहे.
वणी: बातमीदार
