● पक्षप्रवेशाची शृंखला सुरूच
● 200 कार्यकर्त्यांचा प्रवेश
पक्ष संघटन वाढविण्यासाठी काँग्रेसचे स्थानिक पदाधिकारी चांगलेच सरसावले आहेत. भाजप नगरसेवकाच्या प्रभागात भगदाड पाडण्यात येत असून पक्षप्रवेशाची शृंखला सुरूच आहे. रविवारी माजी आमदार वामनराव कासावार यांच्या नेतृत्वात प्रभाग 1 मधील 200 कार्यकर्त्यांनी काँग्रेस मध्ये प्रवेश केल्याने भाजपच्या गडात काँग्रेसची “प्रवेशबाजी” सुरू असल्याचे दिसून येत आहे.
स्थानिक पातळीवर पदाधिकाऱ्यांनी काँग्रेस चा “हात” मजबूत करण्याचा निर्णय घेत माजी आमदार वामनराव कासावार यांच्या नेतृत्वात पक्ष बांधणीची रणनीती आखली आहे. स्थानिक स्वराज्य संस्थांच्या निवडणुका जवळ येत असताना संपूर्ण ताकदीनिशी रणांगणात उतरण्याचा निर्णय स्थनिक पक्ष श्रेष्टींनी घेतल्याचे सकृतदर्शनी दिसत आहे.
येणाऱ्या निवडणुकीत पूर्ण ताकदीनिशी लढण्याचा निर्धार काँग्रेस पक्षाने केल्याचे पक्ष प्रवेश सोहळ्यातून दिसत आहे. या पूर्वी भाजपचा एक नगरसेवक गळाला लावला तर भाजपा नगरसेवकाच्या प्रभागातील शेकडो महिला कार्यकर्त्यांना काँग्रेस मध्ये सामावून घेत भाजपा समोर कडवे आव्हान उभे केले आहे.
रविवार दि. 25 ऑक्टोबरला नांदेपरा मार्गावरील तिरुपती मंगल कार्यालयात पक्षप्रवेश सोहळा आयोजित करण्यात आला होता. सोहळ्याला माजी आमदार वामनराव कासावार, डॉ मोरेश्वर पावडे, प्रमोद वासेकर, इजहार शेख, टीकाराम कोंगरे, ओम ठाकूर, प्रमोद निकुरे, संध्या बोबडे, मंगला झिलपे यांच्या उपस्थितीत 200 कार्यकर्त्यांनी काँग्रेस पक्षात प्रवेश केला.
वणी; बातमीदार
