● जमीन मालकाला पालिकेची नोटीस, काम त्वरित थांबवण्याचा इशारा…..!
Big News : गंगशेट्टीवार मंगल कार्यालय परिसरातील “मॅकरून स्टुडंट अकादमी” शाळे करिता नवीनतम इमारतीचे बांधकाम धडाक्यात सुरू आहे. संबंधित ठिकाणी कोणतीही अधिकृत परवानगी न घेता बांधकाम सुरू असल्याची तक्रार प्राप्त होताच पालिका मुख्याधिकाऱ्यांनी बांधकामधारकाला थेट नोटीस बजावत कठोर कारवाईचा इशारा दिला आहे. Construction of ‘Macaroon’ school is unauthorized..!
धनदांडग्यांच्या दावणीला बांधलेल्या पालिका प्रशासनाने प्रशासकीय कार्यकाळात अनधिकृत बांधकामाला मूकसंमती दिली की काय असा प्रश्न उपस्थित होत आहे. मागील दोन वर्षांपासून शहरातील मोक्याच्या ठिकाणी होत असलेले अवाढव्य अनधिकृत बांधकाम प्रशासनाला दिसू नये हा संशोधनाचा विषय झालेला आहे.
गंगशेट्टीवार मंगल कार्यालय परिसरात शालेय इमारत निर्माण होत असल्याचे दिसून येत आहे. या अनधिकृत बांधकामाबाबत नगरसेवक सुधीर थेरे यांनी पालिका प्रशासनाला चांगलेच धारेवर धरले. गोरगरीबांच्या बांधकामावर कारवाई करण्याची तत्परता दाखवणाऱ्या अधिकाऱ्यांनी या धनदांडग्यांच्या इमारतीवर बुलडोझर चालवावा अशी मागणी केली आहे. अनधिकृत बांधकाम करणाऱ्यांना भविष्यात जरब बसेल अशी कठोर कारवाई अपेक्षित असल्याचे मत थेरे यांनी व्यक्त केले आहे
मुख्याधिकारी यांनी जागेचे मूळ मालक प्रिया अभिनव भास्करवार यांना नोटीस बजावत कारवाईचा इशारा दिला आहे. तसेच बांधकाम परवानगी, नकाशा, लेआऊट नकाशा, मोजणी शीट, आखीव पत्रिका, सात बारा, खरेदी-विक्री खत, चालू आर्थिक वर्षाची कर पावती, संस्था नोंदणी प्रमाणपत्र, शाळा संचालीत करण्याबाबतचे प्रमाणपत्र, अग्निशमन विभागानचे ना-हरकत प्रमाणपत्र तसेच जागा मालकी हक्का संबंधी सर्व कागदपत्रे सादर करावे व अनधिकृत बांधकाम त्वरित थांबवावे अशी ताकीद दिली आहे.
व्यावसायिक इमारतीच्या अनधिकृत बांधकामाने शहरात खळबळ उडाली असून नगरपरिषदेच्या ठोस कारवाईकडे सर्वांचे लक्ष लागले आहे. अनधिकृत बांधकामांवर प्रशासन खरंच कठोर पाऊल उचलणार का, की पुन्हा एकदा कारवाई फक्त कागदावरच राहणार, असा सवाल नागरिकांकडून उपस्थित केला जात आहे.
ROKHTHOK
