● पीडितेच्या तक्रारीवरून गुन्हा दाखल
Crime News : तालुक्यातील राजूर कॉलरी येथे कौटुंबिक वादातून एका विवाहित महिलेला लोखंडी रॉडने मारहाण केल्याची घटना गुरुवारी 15 जानेवारीला सायंकाळी घडली. या हल्ल्यात महिला गंभीर जखमी झाली असून तिच्या डाव्या हाताला जबर मार लागला आहे. Argument turns into assault, woman seriously injured
पीडित महिला राजूर कॉलरी, येथे वास्तव्यास असून रोजमजुरी करून आपला उदरनिर्वाह करते. तीन वर्षांपूर्वी त्यांचा विवाह कृष्णा बजरंग दहे रा. लालपुलीया, वणी याच्याशी झाला होता. पतीकडून सातत्याने वाद व मारहाण होत असल्याने पीडिता काही दिवसांपासून त्याच्यापासून वेगळी राहत होती.
घटनेच्या दिवशी दुपारी आरोपी पीडितेच्या घरी आला व धमकी देत तिचा मोबाईल फोडून निघून गेला. त्यानंतर घटनेची माहिती देण्यासाठी पीडिता सायंकाळी आरोपीच्या मावशीकडे गेली असता, तेथेच आरोपीने तिच्याशी टोकाचा वाद घालत लोखंडी रॉडने डोक्यावर व डाव्या हातावर जोरदार मारहाण केली.
घटनेची माहिती मिळताच पोलिसांनी तातडीने घटनास्थळी धाव घेऊन जखमी महिलेला ग्रामीण रुग्णालय, येथे दाखल केले. वैद्यकीय तपासणीत डाव्या हाताला फ्रॅक्चर झाल्याचे निष्पन्न झाले. या प्रकरणी आरोपीविरुद्ध बीएनएसच्या कलम 118(2), 351(2), 351(3) अन्वये गुन्हा दाखल करण्यात आला असून पुढील तपास पोलिस करीत आहेत.
Rokhthok
