● लग्न कार्यक्रमाच्या वादातून मारहाण, गुन्हा दाखल
ROKHTHOK | मारेगाव तालुक्यातील मार्डी येथे लग्नकार्याच्या पार्श्वभूमीवर झालेल्या जुन्या वादातून एका व्यक्तीवर बांबूने मारहाण करण्यात आल्याची घटना बुधवारी सकाळी घडली. याप्रकरणी मारेगाव पोलिसांनी एका व्यक्तीविरुद्ध गुन्हा दाखल केला आहे. A trivial dispute… hit in the head with a bamboo stick
पोलीस सूत्रांनुसार, फिर्यादी बाबाराम रामेश्वर सोयाम (60) हे मार्डी येथील निवासी असून शेतमजुरीचे काम करतात. दिनांक 7 मे रोजी सकाळी सुमारे 8 वाजताच्या सुमारास पुतणीच्या लग्नकार्यामुळे पाहुण्यांना बोलावण्यासाठी ते आपल्या भावाच्या घरी जात होते. त्यावेळी आरोपी संतोष नथ्थुजी सोयाम (47), राहणार मार्डी याने त्यांना अडवून मुलाच्या लग्नावेळी शिवीगाळ केल्याच्या कारणावरून वाद घातला.
यावेळी दोघांमध्ये शाब्दिक वाद झाला. त्यानंतर आरोपीने घरातून येळवाची काठी आणून बाबाराम सोयाम यांच्या कपाळावर व डोक्यावर मारहाण केल्याचे फिर्यादीत नमूद आहे. या मारहाणीत त्यांच्या डोक्यातून रक्तस्राव झाला. आरडाओरडा ऐकून उपस्थितांनी घटनास्थळी धाव घेत दोघांमधील भांडण सोडवले.
या प्रकरणी मारेगाव पोलीस स्टेशनमध्ये आरोपीविरुद्ध भारतीय न्याय संहिता (BNS) कलम 118(1), 351(2), 351(3) अन्वये गुन्हा दाखल करण्यात आला आहे. पुढील तपास पोलीस निरीक्षक श्याम वानखेडे यांच्या मार्गदर्शनाखाली सहाय्यक पोलीस उपनिरीक्षक दिगांबर किनाके, पो. शी. सागर दीपेवार करताहेत.
